本文重點
志強話咗趁季結調整投資組合，中國仁濟（00648）坐咗兩個幾星期無動靜，先行清倉離場，以0.068元沽出四球，蝕咗手續費兼浪費機會成本。至於駿新（00091）昨日成交增加，升勢重現，收到料話猛人入股，即管繼續持有。龍昌（00348）未能突破0.5元轉角位，開市即以0.47元沽出套利，遲一步沽倒跌收場，打回原形。
股仔繼續個別發展，中國木業（00269）靜極思動，股價回咗個幾月，成功尋底，近日回復升勢，昨日成交增加，股價重上10日及20日線，似再展開升浪。
中國木業在一月曾發選擇權股份及認股權證予基金GEM集資逾5億元。GEM肯大手筆「科水」畀中國木業，當然係睇好其前景，但講到底要基金肯行使，公司先有錢落袋。
憧憬全年業績
有消息指，接貨基金有意在第二季內悉數行使認股權。認股權行使價0.23元，較現價溢價七成，基金如果唔係有把握中國木業快有好消息，股價會坐直升機，又點會咁高溢價行使認股權？
雖然內地有打壓樓價措施，但內地房地產市場持續興旺，支持木材價格居高不下，中國木業全年業績有望進一步見好。