尋日响中環一間幾擠迫嘅中式食肆食晏，咁啱前後左右四張枱嘅食客，四聲道開住樓市研討會，熱鬧之餘，亦反映近期的高樓價，的確引起大眾廣泛關注。

樓價今日是否偏高？這確實不是一個容易有結論的難題。事實上，今日全港住戶入息中位數，比九七年增長唔多（但月薪高於5萬元的高級打工仔數目就增加咗唔少），樓價相對普通家庭購買力，的確有跑得太前的情況。可是，考慮到今日按揭息率幾乎是九七年的四分之一，銀行體系總存款卻是當時的2.3倍，港人累積財富多了，借錢的機會成本卻大幅減低，即使利率由現水平翻一番，也只是回到4厘左右，與租樓回報相若。假如撇開難明的「天價」新樓，二手樓價大致仍比九七高峰期低兩成五至三成，負擔得到的話，租轉買的自住物業，入市仲係安全。

發認股證集資高招

因為破世界紀錄的分層豪宅「天匯」買家延遲成交，近期成為新聞焦點的恒地（00012），公布更改年結至十二月底的首份成績表，○八年七月至○九年十二月的十八個月內，賺了143.2億元，當中來自投資物業重估公允值盈餘71.6億元；以現價54.7元計，市值1,174億元，較資產淨值1,331億元折讓11.8%，相對新地（00016）及信置（0083）的22至30%溢價，恒地依然是較抵買的一隻。

業績中，恒地更宣布以5送1比例派送公司輪，股東有權在一年內以行使價58元認購股份，如果認股證被全數行使，恒地可籌得249億元現金。雖然業績中無列明用途，但分析員相信，恒地集資旨在加快向政府補地價，把手上農地更改用途以增加土儲，以及應付內地發展之用。四叔呢招都算絕，股市樓市如果繼續向好，股東行使股證，恒地一年後不愁沒有發展經費，唔好彩市道逆轉，最多就當攞張公仔紙返屋企做紀念，唔使對股權造成攤薄。

姑勿論點，睇好地產市道，都值得把恒地放入投資組合，而部分基金因要預先為股證套戥，令股價尋日跌4.2%，有跌過龍之嫌，55元左右應可留意。