本文重點
眨眼又過一季，恒指首季升幅近3%。雖然臨近長假期，但撞啱基金季結，故大市成交達670億元。好在冇貪心，前日沽出三分之二持貨嘅中芯國際（00981），昨日上衝1.09元後終現回吐，收報1元。上周二阿莊提及嘅三林環球（03938）曾高見0.97元，收報0.9元，升2.2%，成交明顯增加。此外，手持嘅通達集團（00698）高位曾見0.37元，收報0.36元，升4.3%，可坐定定等食胡。
京信通信（02342）又再一年大豐收，剛宣布去年度收益44.4億元，增長75%；純利5.65億元，增長1.48倍。年內，公司經營業務現金淨流入4.85億元，增長1.25倍。截至去年底，公司手持淨現金7億元，增長69.5%。由於前年度公司因換算海外業務而錄得匯兌差額收益9,909萬元，去年相關金額降至1,259萬元，可見公司經常性收益表現甚佳。
3G提供龐大商機
歸根究柢，自內地3G發牌後，電訊商嘅現有2G移動電話網絡不斷提升，加上須鋪設3G移動電話網絡，為京信帶來龐大嘅生意額，從其去年來自內地3G移動電話網絡嘅收益，大幅增加10.9倍至14.4億元，便可見一斑。
展望今年，無線優化方案需求將大幅增加，除3G網絡優化帶來大量商機外，2G網絡優化仍在增長。公司受惠內地啟動3G產業嘅程度有目共睹，若年內印度一如預期發放3G牌照，將帶動3G相關業務走向另一高峰。
京信前年度曾送紅股，去年度分別喺中期及末期各送一次紅股，加上股價迭創新高，做佢股東真係飲得杯落！管理層明言，由於手持可觀淨現金，會視乎業務表現盡量提高派息。
受業績刺激，昨日該股股價逆市升9.47%，收報9.94元，往績市盈率降至十八倍，睇好今年其經營表現將再創新高，毋須被股價價位高而嚇跑，相信股東們可再一年財息兼收！