太子昨日去稻香（00573），同主席鍾偉平講開培訓人才同管理，主席對管理層嘅要求更加一絲不苟，原來高管都要親自落場，體驗前線員工嘅工作。公司CEO梁耀進就去過酒樓洗廁所，而CFO曾穎嘉就在酒樓做收銀，佢話了解前線員工嘅工作之後，對做好管理有大幫助。太子諗，可能日後會見到鍾主席去酒樓廚房炒菜。
去年賺2億增10%
稻香昨日派成績表，去年全年賺咗2.08億元，按年增10.2%，末期股息有6.3仙。今年公司會投資1.3億元，主要喺本港開8間食店，同埋喺內地開3至4間食店，至於投資2.5億元喺本港興建嘅食品物流中心明年投產。