本文重點
港股持續上揚，恒指昨收21,374點，升137點，大市成交增至628億元。阿莊持有嘅中芯國際（00981），昨日曾高見1.05元，由於目標價1元已到，故按計劃先沽出年初買入嘅80萬股，獲利42萬元。換言之，尚餘喺0.79元買入嘅40萬股已經係零成本，會繼續持有。
本欄上周四推介嘅天能動力（00819），走勢相當對辦，昨日高見5元，收報4.99元，升16.05%，較推介當日低位高出兩成多，若有跟進，可睇位食胡。
其他二、三線股方面，今年初以來股價炒高嘅銀創（00706），本月下旬宣布以代價3億美元，向大股東收購俄羅斯金礦項目。雖然呢隻股趕潮流謀「變身」唔係第一次，但今次交易搵咗瑞信做財顧，又似乎係想認真尋求新發展。反正股價已較月初高位回落兩成多，50日線0.67元現支持，且看交易通函發出後，會否再次翻炒。
此外，昨日傳來深滬交易所融資融券交易試點將於今日正式啟動。參考香港嘅經驗，估計推出初期市況或較波動，但長遠而言卻可起穩定市場之效，加上如今A股經去年調整後，已大大減低風險，如無意外，藍籌股將成次季A股市場焦點，順勢關注大型A+H股，就如昨日推介嘅國壽（02628）又或者民生銀行（01988）。
轉型步入收成期
前稱中油香港嘅昆侖能源（00135），去年度純利倒退64.4%至12.03億元，主要係石油上游業務量、價齊跌，而大股東注入嘅天然氣分銷業務效益尚未及時全面展現，相信今年才真正步入轉型收成期。
事實上，昆侖如今已貴為中石油（00857）嘅天然氣分銷旗艦，日後生意唔憂做，單係掛住呢個牌頭，已足以吸引基金經理捧場。今年一月中旬至二月初，昆侖股價由11.5元水平急回至8.5元才止跌，聽聞係有一個機構投資者沽貨，但「有人辭官歸故里，有人漏夜趕科場」，沽出嘅貨源被其他機構投資者吸納，至近月其股價反覆回揚，現已企穩10元樓上，相信沽壓已暫告一段落。喺注資概念支持下，今年股價有機會再創新高，可留意正股及相關衍生工具嘅表現。