雖然市況麻麻哋，但炒股唔炒市，又唔係話完全無嘢玩，較早前宣布投資鋅空氣電池的中油潔能（00260），在業績公布前，股價昨日逆市上升7.6%。

中油潔能計劃投資的鋅空氣電池項目，由北京長力聯合能源技術公司設計和開發，預期產品在北京市推出，主要應用於公交車、客車及環衞車。

鋅空氣電池具容量大、能量高、使用壽命長、性能穩定、無毒無害、沒有爆炸隱患、成本低廉等優點，經過新科技改良後，將成為具競爭力的新型清潔能源。為配合環保，電動汽車為大趨勢，且得國策支持，中油潔能夥同中航國際投資鋅空氣電池項目，值得憧憬。

走勢逆市突破

雖然呢個項目晒士唔算大，但卻係中油潔能踏出轉型的第一步，同時確立中油潔能在中航工業集團內的角色─經營清潔能源和節能業務的旗艦，唔排除未來進一步注資，並將原有的燃氣站業務出售予母公司。

昨日中油潔能在成交增加配合下，走勢突破，逆市創52周新高，初步目標0.61元，跌穿0.44元止蝕。