滙控（00005）繼續陰陰落，充當跌市殺手之外，利豐（00494）去年賺33.69億元，比大行預測低超過兩成，美銀美林將今、明兩年業績預測調低13至15%，目標價削一成去到45元，尋日利豐跌超過一成，收報37.3元，往績市盈率四十一倍，再次證明過高溢價嘅基金愛股，想炒業績必先三思而後行，業績好已經預咗，萬一來個意外「驚喜」，隨時萬劫不復。

港股仍處安全水平

仲有三個交易日，股市就踏入四月份，而三月份的港股，確是少見的牛皮，恒指在20,575至21,440點之間的865點內上落，是去年三月以來波幅最細的一個月，傳統智慧話畀我哋聽，市況波動愈少、成交愈疏落，技術走勢分析的可信度亦愈低。雖然當前股市有如近期天氣般被大霧籠罩，但筆者堅信明天會更好，主要是基於港股預期市盈率仍在十三倍多少少的安全水平，市帳率唔夠兩倍，與歷史0.9至3.2倍比較，同樣唔容易出現股災。悶市最適合業餘散戶，大可以快打慢，花時間刨多幾份年報，搵吓有乜未被發掘嘅心水股，再攤長嚟慢慢買。

半導體股成為搶眼嘅逆市奇葩，易主後的中芯（00981）以及長城電腦入股後鮮有新聞嘅晶門科技（02878），均勁升一成收市。十年唔發市的晶片股咁巴閉，事緣高盛搞咗個兩岸科技研討會，會上晶片界龍頭台積電對今、明兩年出貨目標相當樂觀，咁啱市場研究機構IDC，亦因應平板電腦及智慧型手機需求向上，調高今、明年半導體市場年增長率去到16%同12%，刺激熱錢湧入這落後板塊。

電子消費品需求增

如果憧憬電子消費品需求從海嘯後谷底回升，除了業績時好時壞的圓晶生產商外，唔少周邊產業可能是更佳選擇。建滔積層板（01888）往績唔錯，積層板是其他半導體及電子零件的連接介面，屬生產電子產品的必要部分。內地3G設備投資高峰期，加上家電下鄉政策延續，來自家電元件需求增加，據管理層在業績時透露，今年首兩個月，旗下大部分廠房達滿負荷運作，且在供不應求下，產品售價較去年底有一成至一成五升幅。

經歷海嘯低潮，建滔板業績由○七年高峰的18.1億元，滑落至翌年的12.03億元，○九年回升至16.48億元，目前綜合預測今年將回升至21.9億元，改寫紀錄，預期市盈率9.2倍，以一個才走進復甦周期的行業而言，估值頗吸引。再者，要留意此股財政充裕非常，負債比率低於一成，是少有高息支撐的科技股。