本文重點
美股前晚走低，拖累港股低收。歐元轉弱，加上業績表現略遜預期，利豐（00494）遭基金洗倉，股價急挫10%。同樣剛宣布業績嘅恒安國際（01044）和華創（00291）就較為幸運，股價同升逾5%。睇近期市況「陰陽怪氣」，結算前都係少做少錯為妙。
開始有發展商話，近期樓價升得唔多正常云云，應該如何看待目前嘅樓市，大家心裏有數，眼見香港、九龍、新界「豪宅價」樓盤愈來愈多，阿莊都有啲心寒，樓市炒家宜諗定退路，唔好下下賺盡，小心「貪」字得個「貧」。
阿莊手持嘅中芯（00981）未負所望，昨日逆市開快車，一度高見0.91元，收報0.9元，升9.76%，睇嚟1元目標價好快實現。而前日阿莊換入嘅中國南車（01766）走勢亦對辦，昨日高收5.98元，可坐定定等收成。
醫改締造購併良機
國藥（01099）宣布上市後首份年度業績，截至去年底止年度收入按年增23.18%；純利增43.88%。以去年嘅經營數據計，國藥已貴為內地最大嘅醫藥分銷企業，全球排名第三。
除公布業績外，國藥還落實斥資11.9億元（人民幣．下同），收購母公司嘅分銷業務。基本上，業績表現及注資行動皆喺市場預期內，昨日該股收報33.35港元，升2.6%，較去年九月上市招股價16港元高出1.07倍。
展望今年，內地公立醫院改革試點方案出台，將進一步促進醫藥業整合和發展，並為手持現金及等值逾66億元嘅國藥，帶來更多購併機會。
早前國藥被納入大摩指數，基金瞓身買貨，皆因上市招股時，基金攞唔足貨，結果要喺街掃到氣咳。由於內地醫療改革係一個大概念，並且會維持一段長時間，類似國藥呢類龍頭醫藥分銷企業，業務呈現快速增長，購併機會亦甚多，加上基金持倉成本唔平，可繼續享有高估值。