美股屢創新高，港股卻係陰陽怪氣日日高開低收，玩死人。不過，炒股唔炒市，兩會表明要加強潔淨能源發展，管道燃氣股概念仲係如日方中，長炒長有。去年賺2.65億元、增長31%的港華燃氣（01083），早前才獲控股的中華煤氣（00003）注資，收購遼寧及浙江省六個項目，總代價17.22億元，煤氣接受以股份代替現金，變相增持，持股量將由43.41%增至54.65%。
好聽啲講，煤氣在港業務成熟，講得唔好聽，係市場得700萬人，潛力有限，反而內地13億人口市場，大部分省市管道燃氣建設歷史只得六至七年，發展空間相對大得多，港華本身在遼寧省有燃氣項目，交易完成後，遼寧、浙江兩省所有管道燃氣資產都歸港華旗下，有利管理及發揮協同效益，煤氣變相增持，標誌着對港華投下信心一票。
睇番港華二月初由3.05元起步，升得唔算急，但勝在升勢穩定，昨報3.84元，只係比煤氣接貨價3.55元高8.2%，如果睇好交易，同大股東搭埋一條船，依家上車都唔算太遲。
港華燃氣（01083）目標價：4.50元 止蝕價：3.67元