本文重點
港股反彈，惟尾市升幅收窄。由於下周季結在即，阿莊亦計劃趁機調整一下投資組合。基本上，若手持係基金揸重倉嘅大價股，可多坐一會，博基金粉飾櫥窗，但若手持大量近月熱炒嘅細價股，有利可圖嘅話，逐步減持係正路嘅做法。
阿莊一向較少講工業股，但原來呢類股嘅復甦概念亦頗強，就如德昌（00179）、德永佳（00321）、萬裕（00894）等，股價已重返○七年度水平，偉易達（00303）股價更已突破○七年度高位。本月初有飛鴿傳書告訴阿莊，可以留意專做CNC工具機嘅友佳（02398），估唔到過去兩個交易日股價累升逾28%，真係大嘆走寶！
講開呢類股份，阿莊昨日留意到剛復牌嘅億和（00838），公司專做設計及組裝精密金屬沖壓及塑膠注塑模具及相關元件等業務，逾八成營業額來自日本客戶，如Toshiba、Konica Minolta、Canon、Kyocera Mita、Fuji Xerox、Epson及Brother。
前年億和旗下嘅模具研發中心落成，並購置額外嘅設備，去年金融海嘯，旗下金屬製品業務產能過剩，致使去年度上半年純利同比倒退67%，幸而期內經營活動現金淨額增加2.3倍，公司善用手頭現金減債及回購股份，有助提升財務狀況及每股盈利。
財政穩健有利派息
估計現時其每股資產淨值約1.5元，淨負債對股本比率0.22，手持現金及等值2.7億元，財務狀況穩健，有能力維持派息。億和喺中期業績表示，會物色辦公室自動化設備以外行業嘅增長機會，包括汽車、家電及醫療設備等，且看本周五宣布年度業績，會否提供相關嘅進展。
昨日億和復牌，並宣布配售一年期非上市認股權證，每份發行價2仙，行使價2.03元，股價急升14%，收報2.36元，現價距離○七年度高位4.05元仍然有一段距離，若整體業務復甦進度理想，應可重新吸引投資者注視。