本文重點
最近因亞視股權紛爭而曝光率勁高嘅旺旺（00151）主席蔡衍明，公司昨日發表最新年報，當中講述企業文化嘅章節，有蔡衍明題字嘅「公司訓」，主要有五大項，包括「確實認識自己」、「切實反思自己」、「隨時提醒自己」、「篤實把握自己」及「絕對發揮自己」，呢五大「中心思想」，對佢單股權紛爭事件有無乜嘢啟示呢？
至於公司嘅經營理念：「緣、自信及大團結」，同經營指標，除了可由「旺仔」身體嘅每一部分作解說外，佢自己亦有題字，蔡衍明應該幾鍾意書法！
去年薪酬增25％
旺旺亦好注重企業文化建設，定期舉辦各類增加員工向心力嘅活動，例如唱歌、演講同晨操比賽等等。舊年公司就搞咗個全集團員工參與嘅「愛生活、愛旺旺」攝影比賽。「旺旺人」以真摰自然嘅鏡頭記錄咗公司嘅人、事、情。
年報仲刊登咗兩張得獎作品，一張題為「又見旺旺大禮包」，大家都知旺旺大禮包係每年農曆新年最hit嘅禮品，現已幾乎成為春節嘅代名詞。太子從相片中見到一位民眾拿住大禮包，笑到見牙唔見眼，個幸福同滿足樣，真係幾令人感動㗎。
年報亦披露蔡衍明去年年薪總計為552萬美元（約4,305萬港元），比上年嘅441.4萬美元，上升25%，主要係因為花紅大增所致。