23/03/2010

播放本新聞相關短片
查詢股票編號

股海實戰:三林炒復甦概念

雖然恒指昨日下試21,000點承接,但喺期指結算及基金季結前後,市況波幅擴大係意料中事,除非外圍氣氛明顯轉差,否則暫未有進一步大跌之虞。

細價股繼續輪流炒,具3G概念嘅晨訊科技(02000)急升15%、TCL通訊(02618)再升12%。

講開3G概念股,令人費解嘅係,去年底掛牌嘅摩比發展(00947),股價仲潛緊水(招股價3.38元,昨收3.18元)。摩比專門開發天線及基站射頻子系統,控股股東來自中興(00763)嘅高層,而中興乃摩比嘅最大客戶,佔收入逾三成。

去年中興嘅手機銷售按年增長逾四成,管理層預期今年能維持相若增幅,全年銷售量有望突破8,000萬部。憑着特別嘅股東背景,照計摩比生意唔憂做。鑑於股價潛水沽壓不算太多,可於3元邊小注低吸等運到。

林業股三林環球(03938)中期業績虧轉盈,半年賺1.2億元,從銷售額、產品出口價以及毛利率可見,截至去年十二月底止的中期業績已見底,如今業務復甦勢頭已確立。

購煤礦具協同效益

早前公司宣布擬收購嘅煤礦,其實處於旗下經營林區內,鑑於已具備現成相關物流設備,可實現協同效益,亦可藉此完善整體林區環境建設,所以都唔算係「無厘頭」。另外,公司計劃年內將內地地板分銷業務分銷點,由650個增至1,000個,亦不排除會透過收購加快擴展速度。

屈指一算,截至去年底三林NAV1.02元,現價仍有兩成折讓。保守估計現價全年度預測市盈率十二倍,鑑於所處行業已重納上升周期,如此估值並不昂貴。近期股價升上0.8元現支持,聽聞管理層喺中期業績後會見機構投資者反應亦唔錯,短線股價若能突破一月高位0.86元,有機會重上NAV水平,止蝕位0.75元。

阿莊