由於工作需要，太子成日都要喺中環出沒。尋日太子喺國金中心做完嘢想歎番杯咖啡時，咁啱遇到喺國金一期返工嘅港交所（00388）行政總裁李小加嚟買咖啡，原來佢都係咖啡迷，朝朝都要幫襯嗰間大型連鎖咖啡店，如果中午冇應酬，亦會去嗰間咖啡店「打躉」。
努力落實發展大計
見到李小加，太子就問吓佢關於港交所嘅消息，包括新增嘅市場發展科依家請人進度、三年策略計劃進展，同埋大家最關心嘅人民幣投資產品有冇新嘢等等，但係李小加就大耍太極，點都唔肯坐低做訪問。
李小加仲話自從本月初喺港交所年度業績記者會公布三年策略計劃後，都冇做過訪問，因為佢依家要專注策略計劃嘅落實工作，做實務要「少說話，多做事」。