20/03/2010

播放本新聞相關短片
查詢股票編號

滙豐加薪前線最和味

剛剛連續第五年奪得《亞洲銀行家》嘅最佳香港零售銀行殊榮、以及繼去年後再奪最佳銀保獎嘅滙豐,佢哋嘅員工喺下周四就會正式收到花紅,呢排員工亦陸續收到上頭通知實際會有幾多花紅,以及今年加幾多人工。

花紅人工陸續揭盅

獅子銀行嘅高層一早預告咗今年加薪幅度係低單位數字,所以員工都應該心裏有數,奇就奇在有啲員工嘅評級都唔係差到落入第4級及第5級,但一樣無人工加,所以如果有1到2%加幅,已經好值得慶幸。

不過,太子聽聞獅子銀行嘅銷售人員例如客戶經理咁,部分人嘅人工就加得唔錯,由幾個巴仙至一成不等。有啲只係入職幾個月,一樣有唔錯嘅加幅。冇辦法啦,金融海嘯後經濟逐步好轉,銀行界由去年下半年開始增兵,尤其係前線銷售人員,每家銀行都話要請幾百人,加上一啲中資銀行在港擴張網絡,形成一股挖角潮。如果佢哋唔將銷售人員嘅人工加番咁上下,恐怕都好難留住人才。