隔晚美股再升，道指升至十七個月高位，惟港股未能承接升勢，恒指昨日微跌53點。志強持有兩隻股仔個別發展，中國仁濟（00648）仍要整固，股價唔上唔落。駿新能源（00091）則重現升勢，升逾5%，志強維持目標不變，駿新應有資格脫離仙班。
內地通脹有升溫迹象，有研究指內地濃縮蘋果汁出口價格，將展開新一輪升浪，廠商報價由之前每噸低於900美元，調升至950美元以上，海升果汁（00359）跟安德利果汁（08259）變身成為通脹概念股，昨日兩者均逆市上升，以累計升幅計，海升具條件追落後。
美國可口可樂去年購併滙源果汁（01886）爛尾，市場揣測海升或成為可口可樂的收購目標。市場有此憧憬，跟海升的股東背景有莫大關連，高盛目前持有兩成海升股權，而可口可樂重要策略股東美國股神巴菲特，則同時持有高盛跟可口可樂股份，呢個微妙的三角關係，自然令投資者聯想到可口可樂或向自己友大手投資的海升埋手購併。