本文重點
中美就人民幣匯率問題的罵戰升級，內地官方傳媒發炮，指美國先至係世界最大嘅匯率操縱國，冇資格講三講四，火藥味愈來愈濃。究竟中國會否以實際行動表達不滿，進而令股市波動，投資者宜留意事態發展。
中移（00941）宣布末期業績，股價一度高見77.15元，收報76.4元，升1.19%。不過，由於個別地產股現回吐，抵銷了中移嘅升勢，恒指收市報21,330點，跌53點，大市成交617億元。
電子股偉易達（00303）股價已連升四個交易日，昨日高位見92元，收報90.2元，創五十二周即市及收市新高，股價仲貴過大笨象（00005）。尋日阿莊推介同屬藍籌嘅利豐（00494），股價亦升2.6%，收報42元。既然龍頭出口股有景，遲早輪到相關嘅二、三線股接力，宜多做功課，發掘明日之「升」﹗
行業整頓有利冇害
亞洲水泥（00743）去年度純利6.1億元（人民幣．下同），按年增長49%，表現符合預期。由於內地水泥市場產能過剩，國務院早前下發嘅限產措施，正包括水泥行業。不過，政策主導行業整頓，確保長遠健康發展，對於發展已上軌道嘅亞泥來說，係有利冇害。
事實上，近兩年亞泥已有不少新產能獲批，並陸續投產，受限產措施影響有限，加上公司銷售區域覆蓋中西部，食正開發大西北嘅商機。至於華東市場，隨着當局推出新農村建設政策，亦有助穩定水泥價格。
亞泥昨日收市報4.5元，往績市盈率十倍。公司係行業淘汰賽嘅得益者，今年預測市盈率降至單位數字，息率2.5厘，NAV 4.45元，雖然經營規模未能與安徽海螺（00914）直接比較，但勝在根基紮實，且估值吸引，可視為攻守兼備之選。