本文重點
臨近月底季結，大戶似乎按捺不住，開始做嘢，尋日見到大盤掃入地產股，就連國壽（02628）、平保（02318）及神華（01088）等多隻大藍籌亦見炒味。若然呢一個升浪成氣候的話，相信月底恒指有勢叩22,000點大關。
繼新地（00016）公布業績後，新世界發展（00017）昨日宣布中期扭虧為盈，尋日股價就曾經一度高見15.7元。雖然近期政府推售貨尾居屋，但未見對地產股造成太大沽壓。事實上，大家心明政府賣完呢批貨之後，冇三、五年都唔會再有新居屋供應，咁搞法用家上車之心更切，政府係咪幫倒忙， 逼大家上山，為熾熱嘅樓市再火上加油，真係見仁見智﹗
股仔炒風未完，早前阿莊落咗車嘅中電新能源（00735），雖係獲利離場，但沽出後其股價連升數天，昨日曾高見0.92元，條氣真係唔多順，但呢期股仔多選擇，亦唔打算翻兜。至於尋日提及嘅田生（08136），由於尚等候條例修訂結果，故尋日股價牛皮，且看今日能否現突破。
轉戰大價股等食胡
正由於睇好月底指數表現，阿莊建議將部分資金轉戰大價股，博季結食胡。美國一月份批發庫存減少，批發銷售連續第十個月按月上升，利好出口股氣氛，除咗阿莊睇好嘅思捷（00330）之外，同屬藍籌嘅利豐（00494）亦可關注。
利豐喺今年一月下旬與Wal-Mart訂立採購安排，雖然有關安排並非獨家代理形式，但公司預期首個開始營運嘅財政年度內，Wal-Mart將經過利豐嘅平台採購20億美元（約156億港元）貨品。以利豐一年生意額約1,000億元，呢個新客戶規模一啲都唔細﹗
難怪自公布該安排後，大行紛紛唱好利豐。公司將於下周三公布末期業績，且看管理層對今年出口市場嘅評價。阿莊相信，過去多年利豐嘅經營表現優異，只要大環境改善，其復甦概念甚強，股價應該可以再一年跑贏大市。