本文重點
中信泰富（00267）○九全年業績變番靚仔，皆因撥走投資外匯巨額虧損嘅陰霾，曾經強調無打算沽清中信泰富股權嘅前主席榮智健，喺業績公布後嘅第二日，減持咗4,285萬股，套現8.16億，都算幾和味。
去年五月榮太子減持過中信泰富，佢話係因為自己要成立新公司有資金需求，唔通榮太子今次套現又有咩大搞作？
業績公布後趁高減持
榮太子嘅減持行動喺聯交所網站度曝光，三月十一日，即係中信泰富公布業績後嘅第二日，佢分別以平均價19.627元喺場內減持285.2萬股；同時佢又喺場外以每股19元減持4,000萬股，兩單刁分別套現5,597萬元同7.6億元，佢喺中信泰富嘅持股量就由9.45%降到8.27%。對於榮太子減持，中信泰富一於例牌話佢已離開公司，所以唔會有任何評論。
榮太子去年四月離開中信泰富後就透過大摩向市場配售6,000萬股，套現7.32億元。