內地股市昨日偏軟，港股早段失守二萬一關，重磅股表現呆滯，午後跌幅收窄，市場資金集中炒股仔。志強投資組合內三股，中電新能源（00735）終見突破，股價創出五十二周新高，高收0.78元，繼續持有。駿新能源（00091）午後升幅雖收窄，但聽聞其拍檔中石油集團不停加碼入貨，相信有後着，一於任由盈利繼續滾存。剩低中國仁濟（00648）進行整固，由於將再有醫藥股申請上市，料稍後可發揮影子股效應，耐心等待。
仙班股愈炒愈熱，食住個勢再向呢類股仔埋手，南海石油（00076）股價早前從5仙插水，落到4仙有支持，連續三日4仙不破，最近兩個交易日成交更回升，睇樣調整接近完成。
南海去年底向投資公司Kelton Capital發行1億美元二○一五年到期可換股債券，債券年息6厘，債券換股價7.75仙，較其現價溢價逾五成。南海集資7.4億元用作增加石墨礦石儲備及擴大石墨產量的備用金。
若然債券持有人悉數行使債券換股，未來將佔擴大後已發行股本的47.68%，變相公司轉咗手。Kelton肯用咁高價認購呢隻CB，當然係對公司前景有信心。既然近期股仔炒風熾熱，南海又有足夠熱身，只要嚴守止蝕0.038元，就唔怕跟一轉，目標價0.052元。