市況買賣兩閒，缺乏消息的港股繼續回吐，恒指跌130點，收市報21,079點，成交額繼續不到500億元。市場焦點集中在上市公司業績身上，新世界百貨（00825）截至去年十二月底的中期賺2.72億元，增長5.2%，頭六個月利潤，相當於綜合大行預測全年賺5.85億的48%，應算是符合預期，但以單位數字的業績增長，亦難怪長期成為內需百貨股中最便宜之選，一○年預期市盈率二十倍，比龍頭股百盛（03368）的二十七倍低24%，考慮埋增長潛力，觀感猶如雞肋。

比亞迪高估值難解釋

因為巴菲特的關係而進身成為基金愛股嘅比亞迪（01211）及子公司比亞迪電子（00285）成績表曝光。生產電池兼營環保汽車的比亞迪，去年賺37.94億元（人民幣．下同），勁升2.7倍，而股價在過去一年則升咗3.6倍。

比亞迪○九年395億元的銷售額中，按業務區分，汽車佔57%、手機部件佔36.5%，電池剩番微不足道的6.5%，而按盈利貢獻，三大業務則分別佔72.9%、16.1%及11%。

說比亞迪完全轉型，相信無人反對，但對於比亞迪的估值釐定方式，筆者卻有摸不着頭腦之感，事關以現價69.05元計，往績市盈率是三十五倍，如果主力是汽車業務，按造車股龍頭預期市盈率亦只係十六倍，先不談汽車下鄉政策可以持續幾耐，但給予銷售額微乎其微的環保車業務如此高昂的PE，捧場客自是難以安心。

盼成汽車外業務旗艦

至於電池業務，面對全球對環保的關注及行業日趨激烈的競爭，電池生產已是明日黃花，這一點從市場幾隻同類股份低殘的估值可見一二。最後剩低的手機配件業務，如果值得咁高估值，則難以解釋何以唔用17.3倍市盈率買比亞迪電子，而要畀貴咁多買阿媽比亞迪。

話說回頭，比亞迪電子今次業績認真麻麻，賺7.59億元，倒退1%，毛利由20%跌到14%，銷售額升三成，但應收帳急升一倍，令人擔心可能係為求搶客而引致賒帳風險上升。講到尾，比亞迪電子的最大價值，可能係未來當系內為求清晰分工，將三大業務重組，屆時比亞迪電子有望擔當汽車業務外的旗艦角色。