本文重點
港股繼續窄幅上落，細價股就愈炒愈狂野，具華懋概念嘅股份逐一起動，繼安寧（00128）急升後，昨日又輪到丹楓（00271）發圍，一升就54%，成交高達5.91億元。但要提大家，細價股炒到呢一浸，似乎已接近尾水，跟風高追必須注意風險，免得接下火棒！
浙江滬杭甬（00576）去年收益下降4.5%至60.36億元（人民幣．下同），純利下降5.1%至17.9億元。不過，較去年中期及首三季度數據，其整體表現已穩定下來。而證券業務嘅佣金收入，同比增長逾五成至15.82億元，抵銷了公路業務倒退嘅影響。
展望今年，來自杭州灣跨海大橋開通嘅分流效應已趨於穩定，而滬杭甬高速上海段工程亦已於去年底完成，料全年通行費收入將止跌回升。至於周邊申嘉湖杭高速公路和諸永高速公路亦於今年相繼開通，分流情況仍有待觀察，惟五月上海世博開幕，相信會帶動區內車流量。
增長要靠證券業務
滬杭甬無心插柳嘅證券業務，發展形勢比想像好，管理層披露，浙商證券正爭取成為第二及第三批融資融券試點公司。此外，今年次季股指期貨開波，相信亦有助帶動證券業務發展。管理層更表明，正研究向董事會申請注資浙商，可見嚟緊公司會繼續做好呢門「副業」。
平心而論，滬杭甬現有嘅公路業務表現缺乏驚喜，即使尋日有指母公司的注資行動將於今年內有眉目，但進度如何仍未知，看來未來公司盈利增長動力仍要依靠風險較高嘅證券業務。以該股現價計，若看待成公路股，估值不算便宜，但計及證券業務因素，則估值又不算昂貴。過去大半年，股價主要喺6.3至7.6元水平上落，繼續炒波幅，候回試橫行區支持位再睇位上車。