恒地（00012）一年一度嘅大日子又到，但唔係公司成立周年或者公布業績，而係集團嘅icon四叔李兆基，佢呢個星期日係八十一歲大壽，集團上下呢幾日亦特別熱鬧同喜氣洋洋。
四叔喺農曆正月二十九日出生，計番今年新曆就係三月十四日。每年四叔大壽，佢都例牌低調慶祝，只係相約親友同恒地高層，到佢半山麥當勞道惠苑嘅豪宅食餐飯。雖然四叔只請至親好友，但據聞今年都要擺成13圍，由「富豪飯堂」之稱嘅福臨門到會。
生日禮物堆滿辦公室
四叔嘅「飯堂」國金軒，就特製兩款壽包：傳統蓮蓉蛋黃壽包同富貴燕窩壽包。太子仲八到，四叔已經陸續收到生日禮物，鮑參翅肚已經堆滿咗佢嘅辦公室。