昨日收市後，新地（00016）宣布中期純利65億元，高於市場預期，消息應利好地產股表現。新地昨日收報114.5元，升0.1元。此外，上周五阿莊推介嘅恒安國際（01044）股價反覆向上，累升近一成，短線料可如期叩60元關。另本周一阿莊增持嘅中航科工（02357）已升穿4元，可穩坐釣魚船。

比亞迪一系要目及實

還有一系股份值得予以高度關注，乃比亞迪（01211）及比亞迪電子（00285），兩者將於今日公布業績，係憧憬業績報佳音，抑或憧憬業績後有大動作跟尾，不得而知。不過，近日市場確實盛傳，短期內地將推出有關補貼電動車消費嘅政策，作為龍頭電動車股嘅比亞迪被春江鴨炒起，不足為奇，昨日以大成交重上70元樓上。鑑於已突破去年末季以來嘅下降軌，可逢低買進，迎接新升浪。至於比亞迪電子，買盤亦十分積極，昨日重上7元關，有勢反覆向8.5元推進。

繼續聚焦大晒士股，又可以睇番隻思捷環球（00330）。昨日股價有異動，高位曾見58.35元，收報58.15元，升1元，乃自一月中以來首次喺58元樓上收市，走勢轉強。

阿莊唔只一次講過，思捷去年度業績已見底，未來一年整體業務將穩步復甦，再加上已全購內地合營，受惠內需強勁，未來內地市場貢獻將會增加，有助抵銷歐、美市場復甦較慢嘅影響。短線股價若能突破60元關，別錯失上車機會，按上升通道，向上至少可以睇65元，止蝕位55元。