港股高位整固，恒指收報21,207點，升10點，成交額繼續拍烏蠅，縮水得番584億元。不過，二三線股愈炒愈起勁，仲開始愈炒愈細晒士，個別仙股開始異動，炒友不停搵目標落手。志強見手上持貨無大變動，有升有跌，暫時唔做嘢，睇多兩日再決定。
華懋慈善基金主席龔仁心接受外國報章訪問時表示，自從贏咗遺產官司後，考慮將華懋集團上市。呢個消息刺激「甜甜系」股份上升，當然以甜甜生前持有逾三成股權的安寧控股（00128）最有機會跑出，成為華懋上市旗艦。
除咗安寧外，甜甜持有逾兩成股權的丹楓控股（00271），昨日亦隨安寧反覆上升。
丹楓以投資物業收租為主，由於公司業務未有突破，兼且又無派息，公司市盈率低至不足三倍。不過，一旦華懋籌備上市，相信「甜甜系」股份將進行重組，丹楓自然牽涉其中。
由於華懋不僅在本港擁有地產項目，在內地亦有豐厚土儲及物業投資，可以分開兩間公司上市。甜甜只係丹楓第二大股東，估計華懋有機會買起市值不足10億元的丹楓，令其成為另一上市成員，將內地及本港的地產業務分開上市。
既然昨日安寧已重上日前1.13元高位，丹楓追落後，有條件重返上次0.94元高位，值得一博。