本文重點
去年三月九日，美國經歷上世紀一九二九年大蕭條以來最嚴重的衰退威脅，環球股市資產總值由高峰蒸發咗18萬億美元，當日標普五百指數跌到676點，眨吓眼依家企响1,138點水平，足足反彈咗68%。港股無咁長歷史可以參考，但睇到關於美股「災後」統計數字頗有趣，值得看官們參考參考。連同大蕭條，美國過去大半世紀經歷大大小小十次大熊市，劫後餘生之後的兩年，標普五百指數第一年及第二年平均錄得46%及9%的反彈，明顯見到，第二年的反彈幅度雖不及第一年凌厲，但十次之中有九次股市仍係做好，升幅介乎2至21%，僅得一九三○年嗰次要跌4%收場。
但凡災後的股市投資回報唔錯可以理解，筆者認為首年反彈，主要來自對熊市過度悲觀的一次修正，而踏入第二年，則應該是經濟環境好轉，企業盈利回升支持股市升勢，借用美股數字，或者我哋今年唔應該期望港股再有像去年六成的凌厲升幅，但整體市場氣氛向好，是可以預見，另一次入市機會可能已在眼前。
港股尋日窄幅上落，恒指收市升10點，報21,207點，成交進一步跌到590億元。國壽（02628）的盈喜刺激內地保險股做好，此外內房與內需股亦屬於表現較好的板塊。
內地香煙市場龐大
繼在內需股中尋寶，華寶（00336）過去半年股價在7.1至9元之間浮沉，都算落後。儘管吸煙害處唔少，但內地是全球最大消費國，卻是不爭事實，煙民數目達4億，佔全球煙民三分之一，華寶生產香煙用香精，配方令不同品牌有着不同味道，客戶忠誠度高，而華寶是行內龍頭，年產量2.7萬噸，在內地市佔率達四成。
睇往績，華寶表現一流，盈利短短三年間由2.83億元飆升至11.1億元，複合年增長率達58%，美中不足係管理層透明度唔算高，尚幸除大股東外，首十六個基金股東，揸貨26%（連同大股東等於街貨77%），有助信心，上半年賺6.1億元，市場估全年賺13.2億元，看來有點保守，但以不到二十一倍預期市盈率就可買到行業龍頭，是不俗的選擇。