本文重點
有「金牌莊家」之稱嘅立法會議員詹培忠，一向語不驚人死不休，繼「轉軚」唔玩辭職後，佢揚言下屆立法會功能組別選舉不再參選，因自己已做咗咁多年，唔想再霸住個位，為咗顯示自己唔係隨口噏，佢仲加多「絕對」唔會參選呢兩個字，太子就聽住先。
讚周文耀最佳人選
咁如果佢唔再選，邊個有資格可以做佢嘅接班人呢？詹培忠第一時間就諗起港交所（00388）前行政總裁周文耀，話保羅（周的洋名）係最佳人選。聽聞唔止詹培忠，股壇仲有其他人士游說保羅出選。
除咗周文耀，詹培忠話，商交所主席張震遠做期貨，亦可以參選。當然如果老詹下屆真係唔再選，唔少經紀業界肯定會吼住呢個位，一場混戰在所難免。老詹話，選自己嘅「鐵票」估計就話有數百張啫，但當中能夠成功「過票」畀佢推薦嘅人，就相信唔會有好多票，佢喺數票呢方面，絕對係心思縝密呢！
除咗做議員同買殼賣殼（上市公司）外，老詹最大興趣就係去拉斯維加斯玩百家樂，繼剛過去嘅聖誕節同新年去賭城「斬獲」過千萬元，佢諗住復活節再飛去賭城玩一轉！