本文重點
唔經唔覺內地推3G已經一年有多，但數據顯示，內地嘅3G用戶仍然唔多，除咗電訊商班阿總頭痕外，工信部班官員都想盡辦法去刺激3G嘅使用率，所以經常都見到工信部嘅領導們發聲支持，昨日工信部部長李毅中發功推介3G。佢話希望廣大消費者熟悉3G、會運用3G，令自己嘅生活更加豐富多采。不過原來佢自己仲係用緊2G機，部長解釋話用緊嘅2G機仲好好用，唔捨得換機喎。佢仲話自己平時用手機都係講吓電話，無咩精力去玩其他功能。
自爆年薪僅14萬
李部長為人老實，同場仲自爆年薪只得14萬人仔添，佢話自從○三年離開中石化（00386）加入國資委後，月薪就變到得五、六千蚊人仔，而且一路都無加人工，所以去年嘅收入同○三年嘅一樣喎！