個人銀行花紅四個月

太子同友人傾開，先知原來渣打昨日開始派信畀員工，通知佢哋今年派幾多花紅同加幾多人工，佢哋個人銀行業務嘅員工今年分嘅花紅，好似話介乎○至三、四個月嘅人工，當然表現好啲員工嘅花紅會仲多啲，而加人工嘅幅度就介乎0至4、5個巴仙，有啲同事計埋升職加幅更達到雙位數字添。

舊年盈利下跌嘅渣打個人銀行都咁好對待員工，太子相信佢哋盈利表現繼續好突出嘅企業銀行，無論係花紅或人工方面會更加優待啲員工。舊年渣打無加到人工畀啲員工，但係隨着下半年市況慢慢好番，銀行界又開始搶人，所以佢哋早喺去年第四季已經加咗一次人工畀部分員工。

除咗大銀行有人工加之外，太子又聽聞中小型銀行一樣有人工加，好似話星展嘅加幅係0至3%，而永亨就係0至2.5%，加幅唔夠大行咁吸引喎。