渣打（02888）業績同預期差唔多，可惜股價未能完全收復前日受滙控業績拖累的跌幅，升1.7%，報183元。市場焦點落喺全國政協十一屆三次會議開幕，中央了解到工業維持高出口增長，為環境帶來不能彌補的破壞，代價不菲，近年已轉向強調經濟的可持續發展，低碳經濟發展被視為重要提案，一眾再生能源股因此炒個不亦樂乎。

新能源潛力待驗證

有老友指筆者一直好少介紹再生能源股，錯過搵錢機會。查實唔係史提芬唔想推介，但睇來睇去，港股中除中國高速傳動（00658）之外，唔少本地再生能源股都只係半途出家，轉型再生發電項目或者光伏設備生產，無往績支持兼估值高得離譜。再者，再生能源是否能夠在內地普及，仲有相當大的變數，例如風力及光伏電力，固定設備投資驚人，可惜發電效率較現行核電及火電差一大截，係錢途無限抑或另一個投資泡沫，只能等時間去證明，但肯定唔係穩陣股民嗰杯茶。

中國能源行業中，最具競爭優勢的，肯定是蘊藏量最豐富嘅煤炭及天然氣，兩者基本上不假外求，而且與其他石化燃料比較，又以天然氣嘅低排及環境污染度較低，故最具市場潛力。回顧十年前中國開放管道燃氣承包權，基本上七成市場管道供氣，由五家龍頭企業包辦，寡頭壟斷局面成形。

供氣商盈利有保障

目前中國管道燃氣覆蓋率大約為三成，與發達國家的八成以上比較，仲有相當大的增長空間，供氣商取得地區鋪管承辦權後，二、三十年內生意變相得到政府保障，而氣價的訂定，是購氣成本加上折舊及其他營運開支後，再加一個特定利潤，故覆蓋面愈大，接駁戶口愈多，供氣商的錢途愈是無可限量。

講到規模夠大、手頭覆蓋城市夠多，而基金經理認知度又夠高，要符合以上條件，筆者揀來中國燃氣（00384）、新奧燃氣（02688），以及中華煤氣（00003）的內地上市旗艦港華燃氣（01083）。不過，從三隻燃氣股年報可以見到，近幾年的營運現金流入，是遠遠不及投資現金流出，最進取的中國燃氣，○九年營運現金流入7.22億元，但投資流出高達20.4億元，幾乎是前者的三倍，意味着集團需要不斷的資本流入（或借貸），以支援高速擴大的管道接駁投資。當然，這是增長燃氣股的特色之一，最後是三選一，抑或一籃子掃貨，就要由看官自己取捨了。