本文重點
港股持續整固，恒指昨日高低波幅只有171點，收市報20,876點，跌29點。市場焦點盡在兩會議題，低碳及農業股繼續吸引游資炒作。陽光能源（00757）昨升11%，鉑陽太陽能（00566）升9%。鉑陽昨早開市前時段有3.93億股上板，每股作價0.7元，是否預告今次股價調整經已完成，睇多一、兩日才下定論。
有消息指，喺深圳A股市場掛牌嘅風電設備製造商金風科技（002202），已啟動來港上市計劃，估計最快於次季在港集資介乎82億至120億元。以金風去年預估淨利潤計算，預測市盈率約二十七倍，市場料其H股定價可能喺市盈率三十倍樓上，故見消息帶動本港嘅風電設備股做好。昨日中傳動（00658）升8.7%，中國風電（00182）升3.4%。阿莊仍然持有嘅中電新能源（00735）則升5.1%。
高位累跌近三成
不過，金風嘅規模較大，享有較高嘅估值並唔出奇。再講，以中傳動為例，現價去年度預測市盈率都有二十八倍，論估值唔係特別平。但游資炒作一向唔使咁認真，總之有消息、有成交就一擁而上，何況中傳動由今年初高位20.2元回落至上月下旬低位14.52元，累計跌幅達28%，有足夠理由博反彈。昨日集團成交明顯增加，唔排除升勢有餘未盡，有機會上試19元阻力位，回吐支持位喺15.6元。
順帶一提，中航科工（02357）宣布按每股3.4元配售3.05億股新H股，集資10.38億元，資金作支持購併潛在航空科技資產及一般營運之用。同時，社保亦出售了2,922萬股，料套現最多1億元。昨見中航科工股價一度升上3.91元，惟尾市有獲利回吐，微跌0.5%。期待已久嘅集資計劃終於落實，估計嚟緊會有大龍鳳跟尾，阿莊計劃短期內重新上車。