夏佳理做咗四年主席，市場接受程度很高，佢今屆再做多兩年，幾乎可以講係幾肯定嘅事。不過有心水清嘅人，就提醒太子，從今屆政府委任董事嘅布局，或者可以睇出一啲未來主席人選嘅端倪。話說一直盛傳係下任港交所主席熱門人選之一嘅史美倫，同夏佳理同日加入做董事，換言之，已經做咗四年。

史美倫後年或接棒

根據政府指引，每人獲委不超過六項公職，及任期不超逾六年，因此如果史美倫今屆再被政府委任多做兩年，到夏佳理二○一二年退任後，佢由於做滿六年，再做主席嘅機會就大減，除非政府話做主席嘅年期可以與做董事嘅年期分開計。但如果史美倫今次不再被委任，或只委任做一年，佢二○一二年做主席嘅機會就看高一線。當然以上純屬分析。亦有人同太子講，夏佳理當年做交易所主席，都係「空降」，或者兩年後，政府又再重施故技呢！