內地有報道指，有內地銀行自本月起提高個人住房貸款門檻，除取消七折優惠利率外，還將首套房嘅最低首付款比例調高至三成。但以昨日內房股回吐嘅幅度，又不至於好大，係唔係已完成反彈，別過早下判語。

放大圖片	放大圖片	放大圖片

躋身全球五大手機商

兩隻中資電訊股終現疲態，聯通（00762）喺10元關前卻步，收報9.89元、中電信（00728）冇升跌。三大流動電訊商3G上客進度符合預期，惠及周邊產業，好似隻中國無線（02369），股價突破3元後頭也不回。

講開又講，龍頭通訊設備供應商中興通訊（00763），除咗做大型通訊設備供應之外，近幾年銳意推動手機業務，由低端過渡至中高端市場。去年上半年，中興嘅手機業務收入已逾半百億元人民幣，同比增幅三成。有市場研究機構估計，去年中興已躋身全球首五大手機生產商之列。

今年3G效應將有更全面嘅發揮，中興去年喺三大電訊商嘅3G終端採購中，佔逾兩成份額，勢必成受益者。今年出口市場復甦，亦將成為亮點。最近公司便喺巴塞隆拿GSMA移動通信世界大會上，宣布與高通聯合推出全球首款大屏超薄BMP智能3G手機，且看歐洲市場反應如何。

中興昨日逆市上升，曾叩50元關，收報49.2元，升1.65%。早前公司已發盈喜，預計去年度淨利潤介乎23.7億至25.8億元人民幣，按年增長43至56%，有機會再增派息兼送紅股，長線股價高處未算高，相信公司可再一年讓股東財息兼收！