本文重點
恆地（00012）虎年頭炮新盤沙田名家匯展開宣傳攻勢，昨日邀請太子o既傳媒老友去中環IFC Palace影院睇「名家睿智電視廣告首映禮」，o個段片計劃三月九日在中港兩地啟播。喺睇到呢段耗資約600萬元、遠赴南非實景拍o既電視廣告片之前，太子見到恆地掌舵人四叔（主席李兆基）現身大銀幕，原來大會安排大家先睇一段長七分鐘o既公司介紹短片，並由四叔親身上陣演繹，介紹公司o既發展理念同抱負，仲有唔少中港拿獎發展項目，拍攝地點以o既地總部及四叔o既辦公室為主。
孫女照相伴顯溫馨
四叔o既辦公室設計簡潔而溫暖，寫字台上更放了孫女o既相片及一尊金財神，而四叔o係片中透露恆地係香港擁有最多農地o既發展商，內地o既土儲亦達1.2億方呎。事後問番公關，佢話四叔唔係第一次拍呢類片，只是平時段片畀企業或基金經理睇，藉以了解公司，今次罕有地播畀傳媒睇。