市場之前一直憧憬，春節過後內地會有支持新能源發展的方案提出，加上兩會舉行在即，故近日唔少相關股份都見蠢蠢欲動，身為內地最大風力發電企業的龍源電力（00916），其股價經一輪調整後，過去兩個交易日見反彈，並成功收復10日及20日線，走勢轉強，值得留意。
國家為鼓勵新能源行業的發展，早前推出了一系列的扶持政策，龍源作為風電股一哥，必定可以從中受惠，加上集團預期今年年底時，風力發電裝機容量將逐步增加至6,500兆瓦，較去年底上升45%，今年整體售電量亦可望大幅提升，盈利前景自然可以睇高一線。
由於上市時間不長，故龍源蟹貨唔多，一旦大戶儲齊貨開車，升勢將非同小可。股價自於8.8元水平覓得支持以來，唔少大行均見密密吸貨，過去五個交易日，摩根士丹利現身買盤最為積極，有413次，瑞銀證券亦有379次。到昨日，里昂證券以及大和資本亦見跟進，投資者不妨儲定貨等開車。