潮流興親自下廚，無論男男女女，都愛煮番幾味，提高生活品味。有股壇「大家姐」之稱嘅蔡陳葆心，唔好睇佢平時成個女強人咁款，原來佢都愛入吓廚房。籍貫屬廣東潮州嘅佢，拿手好戲當然係煮潮州食品，好似蠔仔餅咁，食到大家津津有味。
佢話呢啲潮州家常小吃，唔係乜嘢貴價餸，但就勝在有親切感。每逢過年過節，都有好多人提出，不如叫佢整番幾味，等大家試吓佢嘅手藝。
捐款家鄉辦學
除咗煮番幾味，蔡太亦好鍾意飲茶，單係佢辦公室啲茶具，就知佢有幾講究，佢特別喜歡飲鐵觀音。潮州係佢鄉下，除咗煮潮州小食耍家外，佢亦曾捐款到家鄉開辦「陳葆心學校」，對潮州真係非常有感情！