昨日港股顯著回升，恒指收報20,377點，接近全面收復上周五失地。志強都話係港股跌過龍，尋日若非內地股市牛皮偏軟，港股仲可以升多些少。不過成交依然薄弱，志強所持重機（02722）及英皇證券（00717）略為回升，但未見鑊氣，惟有繼續等運到。珠江鋼管（01938）都算唔好彩，受同類股份勝利管道（01080）下跌所拖累，惟兩股現價市盈率已跌至合理水平，等市況回復強勢，或考慮吸納。
昨日台資股有追捧，其中唯冠（00334）升逾一成，高收0.54元，成交亦活躍。集團將進行債務重組，較早前亦表示考慮引入策略股東，加上集團在內地開拓LED燈業務，應該有望翻身。
唯冠與華冠科技（中國）簽下進軍LED業務的備忘錄，內含幾項建議，包括成立合資企業，生產LED燈具，開發、設計、製銷太陽能電池；其次，華冠正研究配合唯冠重組計劃，購入唯冠新股，變相直接參與注資。另一個拯救唯冠的方法係華冠畀生意唯冠做，就有關產品提供製造及保養，又或由華冠向唯冠採購礦產物。上述幾個方法，都有助唯冠脫離困境。不過，唯冠始終仍未完成債務重組，參與炒作要注意風險。