講番將軍澳地皮拍賣，在一輪激戰後，最終由新地（00016）以33.7億元投得，僅差3,000萬元即抵達市場估計上限，以每方呎地價成本4,627元計，經已比同區二手樓有過之而無不及，又係一次麵粉貴過麵包的結果。

本地樓價居高難下

無論係六十、七十或者八十後，目前坊間看法最為兩極化的，莫過於金融海嘯後不斷攀升的樓價。

特區政府以九七癲價比目前仲高出兩三成，因而認定未算泡沫，但不少用家見到西環新樓萬幾蚊一呎，屯門亦索價五、六千，唔少人認為本港樓市已脫離市民負擔能力。

平心而論，近十多年港人收入中位數的進帳有限，但只係反映打工階層，睇番有銀人士，港人銀行存款由回歸時的2.7萬億元，到去年底翻了不止一番，到6.4萬億元，閒置在銀行戶口的鈔票多的是，每年樓市成交總額不過3,000億到4,000億元，可想像，只要部分唔甘心無息收的游資分流樓市，樓價要跌亦唔容易，而且仲未計內地大款南下購物嘅因素。

賣地反應熱烈，唔明點解政府死牛一邊頸，唔肯降低拍賣門檻增加供應，其實只要減低勾地按金，等發展商唔使成日為他人作嫁衣裳，得個勾字，政府也可收到控制樓價被過度炒賣的效果。

地產股走勢大落後

與節節上升的樓價比較，地產股背馳情況嚴重，長實（00001）比去年十月高位低13%、恒地（00012）低17%、新地及信置（00083）低21%，新世界（00017）更達28%。好明顯，地產股投資者和樓市買家睇法各走極端，無論邊一邊睇錯都好，史提芬估計賣地反應踴躍，港鐵柯士甸站的天價招標快將揭曉，都有利地產股的折讓收窄。

上述五大發展商之中，恒地擁有最多可轉換用途農地，土儲豐厚，現價50.15元，較大行預測一○年重估後每股資產淨值63元折讓兩成，是上半年心水推介。

免費即市推介任睇

史提芬又有好介紹，想搵當炒貼士嘅投資者，快啲click入money18（網址：money18.on.cc）嘅即市推介，免費即市推介助你縱橫股場。除咗本報專欄作家外，名家陣容還包括有羅尚沛、郭家耀、彭偉新及李韻儀等。