本文重點
將軍澳地皮以高出底價近七成售出，雖然地皮「晒士」唔係十分大，但「餓地」已久嘅發展商競投態度積極，亦反映對後市取態正面。市場傳聞明日發表嘅政府《財政預算案》，將針對中產置業難嘅問題推出措施，但阿莊相信，一日土地供應未有大增，本地樓價未有大幅調整之虞。
回說昨日市況，恒指裂口高開，之後一直喺高位徘徊，除非上周五揸貨過假期，否則只係有得睇冇得食，難怪昨日大市成交僅得442億元，仍未擺脫近日交投淡靜的狀況。
中國商務部公布最新資料顯示，喺本月十三至十九日嘅春節黃金周期間，全國實現消費品零售額達到3,400億元人民幣，同比增長達17%，其中通訊器材銷售同比增幅達19%，3G手機成為市場銷售熱點。另外，期內家用電器銷售額同比增長15%，液晶電視、節能冰箱乃熱門產品，這解釋了為何本月中旬以來家電股升勢如此凌厲。
中移（00941）亦公布了一月份營運數據，上客量按月回升20%，總數達到5.274億名，而3G品牌G3客戶達389萬名，按月增長14%。龍頭電訊商嘅3G客戶持續以雙位數字增長，意味着市場對3G相關嘅內容服務及手機需求保持暢旺，相關股份有望吸引更多長錢進駐。
業務復甦進度理想
講開手機股，又令阿莊想起富士康（02038）。上月該股發出盈警，預計去年度純利按年顯著大跌。老實講，去年業績欠佳嘅因素早已反映喺股價上，反而去年末季其股價反覆回揚，反映市場對今年公司嘅業務復甦進度持樂觀態度。事實上，今年內地手機銷售料達1億部，為手機製造商帶來龐大商機，富士康手執行業牛耳，相信受益不淺。
昨日台灣傳媒報道有關內地保險業赴台投資進展，牽動了一眾「兩岸概念股」嘅神經，富士康升6.3%、阿莊嘅心水推介中芯（00981）亦升16%。再看富士康嘅股價走勢，近月調整成交未見大增，反映沽壓並非想像般大，短線股價若企穩喺50日線8.7至8.8元之上，可確認調整完成，目標再向10元關推進，穿7.8元止蝕。