本文重點
香港近期股樓雙飛，唔少公司都加人工派花紅，留住人才。太子尋日見到經絡按揭轉介首席分析師劉圓圓（Sharmaine），問起佢哋有冇人工加，Sharmaine話佢哋去年第四季已加咗人工，平均加幅仲有一至兩成，真係令人羨慕！
生意暴增 應接不暇
去年樓市交投咁暢旺，連帶按揭業務嘅營業額都暴增，銀行爭到頭崩額裂之餘，當然要借助埋按揭中介公司嘅力量。Sharmaine話，佢哋公司有六十個同事，但係成間公司都好靜，原來係因為電話忙到根本無機會響，似乎大嘆有生意做唔切。
據太子理解，市場嘅薪酬調整，往往都係睇晒全年業績先決定，早則第一季，遲則第二季，但係經絡去年第四季已經落實加人工，可想而知，佢哋受惠樓市不少，仲睇得後市加零一咁好。
好多銀行按揭部去年底已經大張旗鼓話要請人，原因都係有生意做唔切。加人工方面，Sharmaine話加幅好睇營業表現，一般都有一至兩成。佢仲同太子分享邊個同事加咗人工又升埋職。