本文重點
新正頭開工，自然唔少得派利是。尋日係銀行公會踏入虎年後首度召開例會，亦係身兼銀公主席嘅渣打香港行政總裁洪丕正，虎年首次同傳媒見面，佢十分識做，一早準備好一大疊利是派畀傳媒，仲祝記者朋友今年開開心心，唔使咁奔波勞碌。
利是全套渣打出品
擁有「雙重身份」嘅洪丕正，選用咗渣打出品嘅利是封嚟封利是，至於個餡，就係一張50元渣打鈔票。平日形象親切嘅佢，尋日仲化身埋財神，掛住四萬咁嘅笑容，人人有利是，絕不落空，認真皆大歡喜。
尋日記者會上，洪丕正講到內地人行喺春節前上調存款準備金率以吸納過剩資金，跟住佢臨走嗰陣，眼見自己派剩好多封利是，就同記者開玩笑，話要吸納手上多餘嘅資金，方法就係將啲錢放返入銀行體系。太子估唔到，原來洪丕正都不失幽默，而且仲識得借題發揮添。