本文重點
農曆新年前後人事變動通常特別多，就好似商界出身，已經出任數碼港行政總裁六年的楊偉雄，下月就會正式投身教育界，過檔理工大學出任行政副校長，數碼港同大學表面看似風馬牛互不相干。不過，楊偉雄就話今次轉行其實是有感香港經濟及社會的發展，是極之需要人才嘅配合。
太子仲記得楊偉雄由商界投身半官方背景的數碼港時，曾經強調自己是要為本港科技產業嘅基建配套作出努力，事隔六年，楊偉雄就話係時候接受新挑戰，為本港人才發展作出努力。
講番數碼港至今都存在不少爭議，但公平點來說，楊偉雄不但成功將數碼港的商業部分扭虧為盈，而其力推的數碼娛樂企業培育計劃，更取得唔錯嘅成功率。楊偉雄笑說，數碼港商業部分當初未賺錢，有立法會議員就批評項目是浪費公帑，到取得盈利又有議員批評項目是賺取不義之財。不過，佢就強調，言論無損佢同政府與議員的合作關係，最重要是大家能體諒對方嘅立場，才能有利政府與產業界嘅合作。
力挺發展數碼多媒體
講開數碼媒體發展，楊偉雄話早喺○七年已經開始推動數碼3D立體製作嘅發展，當初雖然未獲大家注意。不過，隨着近期阿凡達嘅成功，足以證明具有發展空間，香港絕不應輕易放棄。