志強前日買入嘅華基光電（00155），昨日早段曾高見0.215元，但未能進一步突破，所以以每股0.212元全數沽出，求其贏幾格，算係攞個意頭，發咗新年財算數。沽完華基光電，志強仲有大把時間買重慶機電（02722），以每股1.8元買入10萬股等開車。

現價吸引可收集

昨日大市下跌，主要係無人肯入場，成交唔夠，連唔少二三線股仔亦不敵大市氣氛，顯著下跌。勵晶太平洋（00575）係少數逆市上升嘅股仔，講到尾係因為勵晶現價仍然超值，有識貨之人收集，股價自然逆市上升。

集團目前手持流動資產跟淨現金，折合每股約值0.25元，每股資產淨值高達0.48元，現價折讓高達五成，有捧場客不足為奇。

手頭現金充裕

勵晶表面係一間投資公司，不過經過重組之後，投資項目主要係資源礦產，現價仍未反映旗下資產已大幅升值的因素。況且手頭現金充裕，唔排除有合適項目時，會再進行收購注資。

另一方面，公司已計劃動用7,800萬元進行回購，對股價有一定支持。若然以資產淨值為其目標價，現價上車，仲有一倍回報，跌穿0.21元止蝕，值博率甚高。