自從實施勾地政策，每次賣地淪為地產商配合推盤的宣傳策略，下星期一將軍澳地皮拍賣，新地（00016）趁機開售已軟銷多時的元朗YOHO MIDTOWN（YM），尋日股價逆市企穩，收報102.9元。YM唔單止係虎年第一個開售樓盤，亦係政府收緊2,000萬元以上物業按揭成數指引，以及上調豪宅印花稅後的首個大型屋苑，本地熱錢與內地豪客，會唔會因為豪宅無得炒，轉戰細銀碼上車盤，相信今次開盤反應，多多少少會有啟示作用。

中資電訊股大落後

○九年，一字記之曰「電」，發電股、電力設備股外，最最最落後的要數中資電訊股。在去年這十年一遇的大牛市下，中移（00941）居然倒跌一成，聯通（00762）算叻，但都只係升得一成，輸畀指數一條街。講到底，中國發展3G，政府傾向㩒住一哥中移，畀聯通及中電信（00728）上位，但對於後兩者來說，3G的固定投資及推廣開支唔嘢少，結果形成股價三輸局面。尋日聯通否認競投尼日利亞電訊（Nitel），以及有合組財團參與競投的意圖，但對股價表現亦沒有刺激。

目前Nitel在尼日利亞的市佔率唔夠1巴仙，如果像市場流傳所指，聯通要花170億元（人民幣．下同）買下這管理差劣、兼且用戶不斷流失的電訊公司，聯通股東唔驚至奇。事實上，對聯通來說，當務之急是建立自有3G網絡，固定投資沉重，本身債務水平接近四成，相信沒有太多閒錢響應中央「走出去」的呼籲。

3G上客情況不俗

由於○八年有大筆特殊收益，反之○九年3G WCDMA前期開支龐大，聯通早前發過盈警，預期業績要跌超過五成，市場估計○九年純利跌至104.5億元，較○八年339.1億元跌六成九，以其2,090億港元市值，市盈率17.6倍。以一間處於投資及折舊高峰期的公司，這個估值其實唔算貴，而股價較資產淨值折讓擴大到一成以上，早前跌至8.1元附近，即使唔係短期低位，相信亦不遠矣。觀乎3G上客情況唔錯，捧場客不妨畀多一點耐性。