半新股呢期輪流炒作，但昨日氣氛有變，事緣昨日上午十時零七至零八分，勝利管道（01080）突然有大沽盤殺到，見價就插，結果隻股由1.8元水平插到落1.35元才止跌，但唔使一分鐘股價又上番1.7元，沽得咁急，係咪受「失魂盤」影響不得而知。

放大圖片

放大圖片

中芯持貨考耐性

阿莊愛股中芯（00981）淡市出擊，高見0.7元，收報0.68元，總之呢隻股非池中物，最緊要有耐性持貨。

波羅的海指數回升，刺激航運股做好。中海集運（02866）收報3.14元，升3.63%，由於交投配合，短線企穩喺3至3.1元區域，相信反彈未完，下一目標睇3.4至3.5元水平。

另外，中海發展（01138）將於下月廿六日宣布末期業績，公司已發盈警，料淨利潤同比降逾五成。盈警係市場預期之內，反觀去年公司嘅運輸量未有大跌，盈利下跌只係受運價跌幅較大所拖累，表現算係唔錯，故發盈警後，股價跌幅都係一成左右，現價已重上12元樓上。

早前公司與神華集團成立合營從事沿海散貨運輸業務，有助確保長期運輸量增長，另外亦與寶鋼及首鋼等大型鋼鐵企業簽訂運輸鐵礦石合同，相關收入及毛利亦較穩定。

去年末季以來，運油價格回穩，展望今年尚有上調空間，故券商多料其今年盈利可重拾增長軌道，現價預測市盈率約二十三至二十四倍，若行業指數持續向好，股價有力反覆向14至15元推進，穿10元止蝕。