恒指繼續「乾挾」，收市報20,290點，大市成交只有529億元。正當大家都抱唔做唔錯嘅心態，指數就日日升，呢啲市認真蝦人玩！
中芯（00981）股價調整一天後，昨日即見真章，高位做0.7元，收報0.67元。阿莊擬於0.6元或樓下低吸嘅計劃未能實現，今日係農曆新年前最後一個交易日，會睇情況入場適量增持。
此外，今年家電下鄉政策繼續執行，且範圍將會擴大。近日內地市場消息指，家電下鄉補貼將添上新品種，其中將加入電動自行車，其中早喺前年底已穩佔內地電動自行車電池市場逾兩成份額嘅天能動力（00819），股價急升逾一成，最高曾見3.42元，收報3.4元。
電動車業務成焦點
天能喺去年十月曾按每股3.5元配股集資，之後就可能收購日本電動汽車公司AutoEV及意大利電動汽車公司Start Lab簽訂獨家權意向書，年期一年。呢個大Project能否開花結果，勢必成為今年焦點。
此外，天能已完成建造江蘇省沭陽縣嘅可再生能源廠房，新廠房用於生產利用鉛酸電池生產技術嘅儲能電池產品，去年六月已投產。隨着國家積極推動節能政策，天能早着先機，除了上述儲能電池廠外，還落實投資長興技術開發區嘅可再生能源及電池回收業務，發展策略正確，前景值得期待。
其股價過去兩個月回落至3元水平現承接，若短線反彈企穩喺50日線3.4元樓上，升勢未完，下站睇3.85元，穿3元止蝕。