本文重點
道指前晚失守10,000點關，本以為昨日港股又難逃一跌，誰知恒指見全日低位19,461點後，逐步收復失地，收市報19,790點。高盛首席經濟師兼經濟、商品及策略研究部主管吉姆奧尼爾表示，歐洲經濟問題並非如想像般大，且不擔心英美債務問題。思捷（00330）股價昨日一度反彈上57.25元，收報56.9元，升5.08%。上月阿莊減持套現，沽出思捷獲利，睇呢半個月思捷嘅股價走勢，似乎並非想像般差，所以依家又心思思想上番車，會留意喺55元樓下翻兜嘅機會。
傳獲大股東增資
細價股方面，昨日異動股有和記港陸（00715）。公司將於下月初公布業績，市場憧憬長和系近年獲大股東不斷增持，和記港陸喺公布業績後或成重組對象，吸引不少炒家跟風炒作。係咪一廂情願，不得而知，但睇走勢，股價衝穿1元有成交配合，短線應仲有炒作水位。
此外，阿莊今年推介嘅第一隻股票—中芯國際（00981），昨日收市後公布第四季業績，由於需支付2.99億美元的訴訟和解開支，令期內股東應佔虧損由第三季的6,930萬美元大幅增加至4.82億美元。老實講，業績唔好一早預咗，但昨日股價依然繼續炒上，高位曾見0.68元，收報0.67元，升4.69%，主要係市場盛傳其策略股東大唐電信計劃向中芯增資，而中芯本身其後亦發聲明，證實正與投資者商討注資一事。
當日阿莊推介時已表明，由上市至今已衰足五年多嘅中芯，喺跟台積電嘅糾紛了結，以及高管易人後，今年在各個方面都醞釀「大變」，而任何變化應該會係朝好嘅方向發展。
阿莊喺一月初買入中芯80萬股，平均買入價0.51元，其後股價曾高見0.73元，上月底港股調整，中芯亦跌番落0.56元。若短期有好消息配合，股價可再試上月高位，短期股價再現波動，0.6元樓下值得考慮加注。