本文重點
有人話「80後」年輕人唔捱得苦，工作態度麻麻，只係識成日發夢升職加人工。早兩日太子喺中環同恒豐證券董事總經理張華峰、研究部董事林家亨（Simon）歎下午茶，講起「80後」，佢哋就講起自己少年時嘅奮鬥史。
張華峰笑言自己曾經都係「80後」，當年嘅月薪只得一千蚊，收工後仲要去做兼職，但求搵多二、三百蚊傍身，但從來無任何怨言。直到八十年代初，佢開咗自己嘅證券行，為咗睇住唔同國家嘅股市狀況，好多時候都會鋪張地氈喺公司度瞓，第二日又再開工。
林家亨初中賣點心
至於Simon，佢去加拿大留學，家境應唔錯，但係佢話：「中二、三時嘅暑假，喺阿媽搭路下，去咗酒樓推點心車賣點心，幫補家計。」時間飛快，Simon笑言張老闆都已經由「肥仔張」變成「肥佬張」啦。十年人事幾番新，張老闆同Simon喺業界有今時今日嘅成績，背後一定付出咗好多汗水和努力。