彤叔雖然唔多清楚確實嘅加薪幅度，但就講到明一定加，相信旗下員工都可以過個肥年。

萬邦股東會節衣縮食

其實彤叔不但關心員工，問佢今年有咩新年願望，彤叔就對廣大市民好有心咁話「最好香港人個個有工做，社會安定繁榮，至緊要融洽。」

尋日係萬邦投資（00158）嘅周年股東會，萬邦班老股東就感到失望嘞，原因唔關大跌市事，而係冇靚嘢食。萬邦有一班好忠心嘅股東，彤叔好識做，以前會將股東會時間安排喺中午，開完會就一齊食餐勁，甚至試過有鮑參翅肚，但呢兩年所有公司都要節省成本，萬邦尋日就响下晝三點開會，會後就無咩驚喜，希望今年經濟繼續好，明年老股東可以再有魚翅食啦。