再睇內地一樣都有咁嘅情況，A股昨日成交就跌到只有853億元人民幣，乃超過四個月以來最低，一來係人行限制銀行貸款的傳聞，唔似空穴來風，史提芬認識的賓架們，共識都係要等市場洗完牌，人行落實加息至好入場賭過。總結現時形勢，如果話中港股市中期調整完成，筆者最多信佢三成，後市恐怕仲會再試低位。

奧巴馬搵賓架祭旗

十年前，科網泡沫爆破後，美國總統布殊上場正好碰正「九一一」事件，可謂幫他一大把，將伊斯蘭及中東恐怖分子妖魔化，發動反恐戰，順利將公眾對經濟問題的關注轉移；到了○八年奧巴馬上場，選前雖然講明唔會再花公帑屯重兵伊拉克，但面對高失業率及樓市疲弱，結果都係要照辦煮碗，搵個新公眾敵人轉移視線，最後就揀咗華爾街銀行家開刀。

從剛發表的國情咨文中，奧巴馬就揚言，輕度的金融改革無助改善當前問題，教人擔心除咗向銀行家抽重稅、限制銀行參與炒賣以及擁有對沖基金之外，美國政府對華爾街的打擊招數仲會陸續有來。

受惠外判盈利穩增

是次的國情咨文重點係創就業、減赤字及協助中小企，無論結果得唔得，初步市場反應都幾正面，對主攻出口北美市場的公司，短期心理上唔多唔少有幫助。

筆者首先諗起利豐（00494）及裕元（00551），論估值，又以裕元較合心水。這全球最大的鞋產品OEM及ODM生產企業，唔少人認為生意太大，無進一步拓展空間，但事實歐美運動品牌在慳皮及改善供應鏈管理考慮下，外判比例不斷提高，裕元順理成章成為受惠者，營業額及收益均有長足之進。五年來，純利由2.97億（美元．下同）升到4.64億元，去年其三分之一產品出口北美，而原材料價格從○七、○八年的高峰回落，亦有幫補作用。

大行預測裕元今、明兩年純利4.66億及5.08億元，市盈率11.6倍，同過去十年兩次高峰期的十八至二十倍仲有距離，趁近日股價跟隨大市回落，24港元樓下係中線持貨者理想的收集時機。