內地股市方面，滬綜指尚未收復三千點關，昨日收報2,994點，升0.25%。從成交可見，市場觀望氣氛濃厚。新股中國西電首天掛牌即告「破發」，金融及有色金屬板塊仍然受壓，游資轉攻旅遊及海南板塊。
人行開始從房貸着手調控樓市，加上息口上調係遲早嘅事，內房股股價表現呈一浪低於一浪，睇嚟至少首季內都冇運行，可以少睇一瓣。
此外，中央「一號文件」傳聞將於短期內出台，「三農」問題將成焦點，農業股可以留意，其中第一拖拉機（00038）股價落到5元邊跌勢放緩，技術指標亦呈明顯超賣，小注博反彈，目標重上5.5元樓上，穿4.8元止蝕。
港股方面，前兩日跌勢頗急嘅二、三線股，昨日藉機反攻，海爾電器（01169）反彈13%，而亨得利（03389）升8.8%。不過，阿莊始終認為，目前並非搏殺嘅時候，落場大大注博反彈，都係可免則免。
比亞迪雨過未天青
講開又講，近月基金沽空大晒士股斬獲唔錯，除內銀股外，比亞迪（01211）亦為大戶沽空對象，股價由本月高位71.8元回落至近日低位52.25元，累計跌幅達37%。該股昨日反彈逾5%，收報56.55元，相信與部分大戶喺月底平倉計數有關，但是否雨過天青，且多睇幾日再下判語。
建滔化工（00148）表示，分拆河北煤化工在港上市嘅申請尚有待港交所（00388）批准，初步計算，建滔股東可按17比1嘅比例認購河北煤化工預留股份，但確實配額仍有待公布。缸邊消息指，河北煤化工本來喺前日舉行投資者推介會，但因市況欠佳而延期，上市日可能喺春節後。
不過，建滔股價未有因此而出現太大沽壓，昨日收報34元，升4.94%。事實上，公司唔係等錢用，用不着喺跌市硬推分拆計劃，待春節假後市況回穩才行事，係理智嘅做法。
去年七月，建滔曾減持建滔積層板（01888）股份，套現逾7億元，如今又計劃分拆河北煤化工上市，套現資金除可用來加強化工及印刷線路板業務外，亦可令公司業務架構更加清晰，未來發展應可取悅機構投資者。
短期股價料喺30至37元水平上落，待分拆一事明朗化，可叩40元關。